Á bloggi sínu í gær sagði Ómar Ragnarsson frá öskubakka sem hann á, sem gerður var af Baldri Svanhólm Ásgeirssyni. Baldur gaf föður Ómars öskubakkann sem er með hauskúpu og krosslögðum leggjum á kantinum, kannski til að minna á hættur reykinga.
Baldur var einn þeirra Íslendinga sem fór í keramíknám í Dachau árið 1936. Öskubakkinn minnti Ómar á ýmislegt ljótt frá þeim tíma og mun Ómar fjarlægja bakkann á jólum, svo hangikjötið standi ekki í fólkinu hans, sem er allt pólitískt rétthugsandi.
Ég gerði athugasemd við færsluna á bloggi Ómars Ragnarssonar og bætti þar við nokkrum fróðleiksmolum. Ómar svaraði því ekki beint en skrifaði:
Allur heimurinn vissi um Dachau fangabúðirnar 1936 en samt voru Ólympíuleikarnir haldnir í Berlín. Halldór Laxness fylgdist með útrýmingarréttarhöldum Stalíns og lét sér vel líka.
Ekkert, ekki einu sinni loforð Obama, virðist geta haggað fangabúðunum á Guantanamo.
Þyrluflugmennirnir bandarísku sem sölluðu með ánægju niður óbreytta borgara í Bagdad, voru ósnertanlegir en þann, sem kom upp um ódæðið á að senda í langa fangelsisvist.
Það leynir sér ekki að Ómar hefur unnið á Fréttastofu RÚV, og kannski sett þar ásamt öðrum grunntón heimsku og einfeldningsháttar.
Ætli Ómar sé virkilega að líkja saman gyðingum í Dachau og hryðjuverkamönnum á Guantanamo? Veit Ómar hvers konar fólk sat og situr inni í Guantanamo? Veit Ómar ekki, að það fer tvennum sögum af því hver "fórnarlömb" þyrluskotárásar Wikileaks voru? En vitaskuld trúir Ómar frekar Kristinni Hrafnssyni en skynseminni.
Danskur Guantanamofangi var sendur heim frá Guantanamo. Hann fékk starf sem póstur. Í starfi sínu í Greve og Hróarskeldu stal hann greiðslukortum og pössum, meðan að hann var að stefna dönskum ráðherrum. Eftir að hafa setið 10 mánuði í steininum í Danmörku, sneri aftur í stríð sitt fyrir Allah og er nú talinn af, drepinn í stríðinu á Sýrlandi.
Gyðingar í Dachau voru hvorki þjófar né hryðjuverkamenn. Reyndu að koma því inn í kollóttann hausinn á þér, Ómar Ragnarsson. Öskubakkinn þinn hefur ekkert með Guantanamo að gera. Öskubakka Guantanamos finnur þú í New York. Eða mannstu ekki lengur 11/9, 2001?
